Þegar við keyptum húsið ætluðum við upprunalega að notast við gamla baðherbergið sem var fyrir og reyna bara að mála og betrumbæta það. Hinsvegar þegar við fórum að skoða það nánar fannst okkur það ekki alveg vera að gera sig, sérstaklega þar sem baðkarið truflaði okkur alltaf svoldið, eða réttara sagt hvernig það snéri. Þá var rýmið í raun allt á lengdina og sneri baðkarið langsum sem lét herbergið virka langt og mjótt.

Við ákváðum því að geyma það bara að gera upp eldhúsið og notuðumst við það sem var til staðar í gamla eldhúsinu, með smá tilfærslum og lagfæringum, en um það má lesa hér.

Við rifum allt út af baðherberginu, og var það langdýrasta herbergið í framkvæmdunum, en það át upp tæplega helminginn af fjármagninu okkar. Við sjáum hins vegar sko ekki eftir því enda erum við himinsæl með útkomuna.

Baðherbergið var líka eina rýmið þar sem við vorum nær algjörlega háð iðnaðarmönnum, en við létum þá flísaleggja, færa til blöndunartæki, tengja klósett og baðkar og setja upp blöndunartækin. Allt annað gerðum við hjónin sjálf. Við máluðum, settum upp sturtugler og skápa, og svo fræsaði Raggi sjálfur fyrir gólfhitanum. Ég get því rétt ímyndað mér hvað upphæðin hefði farið í ef við hefðum ekki gert það sem við gerðum sjálf.

Hér er baðherbergið orðið nánast fokhelt og ekkert eftir nema baðkarið  Hér virkar baðherbergið mjög langt og mjótt og reyndar bara frekar lítið. 

Byrjað að flísaleggja og búið að taka sturtuklefann út. Blöndunartækin í sturtunni voru svo færð á veggin þar sem hurðin er

Hér er Raggi búinn að vera að fræsa fyrir gólfhita 

Píparinn sem kom til okkar sagði að það væri ekkert mál að fræsa fyrir gólfhita og það myndi taka svona 2 klst. Raggi var að því í tvo sólahringa og rykið var þvílíkt að hann þurfti að fá lungnameðferð þrátt fyrir að hafa verið með rosa grímu (Gasgrímu eins og í Bad Boy Bubby myndinni hehe 😉 hún greinilega dugði ekki til og húsið varð undirlagt af fínu gráu ryki, sem við vorum lengi lengi að ná í burtu.

En nú skulum við demba okkur í fyrir og eftir myndir af baðinu

Fyrir

Svona leit baðherbergið út fyrir breytingar 

Eins og sést á myndinni fyrir ofan snéri baðkarið langsum og var stór miðstöðvarofn á veggnum undir glugganum. Við ákváðum að taka miðstöðvarofninn og leggja gólfhita sem er alveg málið. Það er ekkert betra en að stíga inn á hlýtt baðherbergisgólfið á köldum vetrarmorgnum.

Eftir

Við ákváðum að snúa baðkarinu þversum til að plata augað og fá meiri breidd í baðherbergið. Núna virkar það bæði stærra og breiðara en áður

Við tókum út alla þessa skápa og settum einfalda innréttingu í staðinn með speglaskáp

Hér sést í sturtuglerið en það var keypt í Íspan. Gólfflísarnar keyptum við í Vídd og veggflísarnar í Álfaborg.

Hér er sturtan eins og hún var áður en það var gamall plast IFÖ klefi sem við tókum út og létum flísalagðan sturtuklefa í staðinn og gler.

Hurðin var svo máluð hvít og húnninn spreyjaður svartur. Finnst það rosalega falleg útkoma, en upprunalega ætluðum við að henda þessum húnum og fá nýja. Hér settum við líka nýja loftlista en þá fengum við í Daninn.

Veggurinn með hilllunum er þar sem baðkarið var á áður en það sneri þá langsum. Baðkarið keyptum við í Bauhaus. Gluggakisturnar voru úr plasti og filmaði ég þær með marmarafilmu sem ég keypti í Bauhaus. Það gerði alveg gæfumuninn og ótrúlegt hvað þær lúkka eins og raunverulegur marmari.

Nokkrir díteilar af baðherberginu 

Við fengum okkur svo upphengt klósett og ákvaðum að flísaleggja ekki vegginn þar sem skáparnir eru. Klósettkassinn var svo flísalagður með veggflísunum og finnst mér það koma mjög vel út til að fá heildarmynd á baðherbergið.

Þar sem við erum 6 manna fjölskylda stóðumst við það ekki að fá tvöfaldan vask með tveimur handlaugum og þvílíkur lúxus sem það er að hafa svona tvo krana.

Við erum alveg rosalega sátt við útkomuna á baðherberginu og gætum ekki verið ánægðari með það og valið hjá okkur á því sem við keyptum inn á það.

Takk fyrir lesturinn 🙂

Þangað til næst

María