-Samstarf-
Hér er afar einfalt en svo ofsalega gott fiski taco að þið eiginlega verðið að prófa.
![](https://paz.is/wp-content/uploads/2022/10/IMG_5495-683x1024.jpg)
Það þarf ekki mikið af hráefnum en hér geri ég sérstaka kryddblöndu á fiskinn sem er samansett úr kryddum sem flestir eiga til inní skáp.
![](https://paz.is/wp-content/uploads/2022/10/IMG_5505-683x1024.jpg)
Ég lofa að þetta er svo einfalt að gera og tekur ekki nema stutta stund og eiginlega eina sem maður þarf að hafa eitthvað smá fyrir er að steikja fiskinn.
![](https://paz.is/wp-content/uploads/2022/10/IMG_5500-683x1024.jpg)
Hér er sósan aðalmálið en hún gerir þetta taco alveg sérstaklega Gourmet gott og spicy. Uppistaðan í henni er avókadó, majónes og jalapenjó Tabasco sósa.
![](https://paz.is/wp-content/uploads/2022/10/IMG_5506-683x1024.jpg)
Það kom mér virkilega á óvart að matvanda dóttir mín alveg elskaði þetta taco og sagði það vera veitingarstaðagæði nema bara betra.
![](https://paz.is/wp-content/uploads/2022/10/IMG_5491-682x1024.jpg)
Ég á allavega klárlega eftir að gera þessa uppskrift aftur og mæli með að þið prófið ! Það mun koma ykkur á óvart hversu gott er að hafa fisk í taco.
![](https://paz.is/wp-content/uploads/2022/10/IMG_5508-682x1024.jpg)
Auk þess er þetta taco afar ferskt en þar leikur limebörkurinn sterkt hlutverk en hann raspa ég út í salatið.
![](https://paz.is/wp-content/uploads/2022/10/IMG_5502-683x1024.jpg)
![IMG_5516](https://paz.is/wp-content/uploads/2022/10/IMG_5516-585x585.jpg)
Hráefni
Hrásalatið
- 90 gr smátt skorið kínakál
- 100 gr smátt skorið rauðkál
- 140 gr smátt skornir smátómatar
- 1 smátt skorið avókadó
- 70 gr smátt skorinn rauðlaukur
- 2 tsk sykur
- Raspaður börkur af einu lime
- 4 tsk nýkreistur limesafi
Jalapenjó-avocado majó
- 1-2 stk marin hvítlauksrif
- 1 dl majónes (ég notaði Heinz en mér finnst það besta majónesið í svona sósur)
- 1/2 þroskað avókadó
- 25 dropar Tabasco sósa með jalapenjóbragði
Kryddhjúpur á fiskinn
- 1 tsk hvítlauksduft (garlic powder, ath ekki hvítlaukssalt)
- 1 tsk laukduft (onion powder)
- 1,5 tsk fínt borðsalt (ath hafið það fínt salt ekki gróft)
- 1 tsk cumin (ekki Kúmen eins og í kringlum)
- 1 tsk sykur
- 1 tsk paprikuduft
- 1 tsk timian þurrkað
- 2 egg
- 1 dl hveiti eða jafnvel ögn meira
Annað
- 350 gr hvítur fiskur en ég notaði ýsu
- 1-2 pakkar mjúkar taco kökur en mér finnst Mission street tacos vera þær allra bestu
- Sriracha sósa en mér finnst frá merkinu Tabasco vera best
- 1 líter af grænmetisolíu eða sólblómaolíu eða canolaolíu
Aðferð
Hrásalatið
- Skerið kálið í mjóar lengjur og restina af grænmetinu mjög smátt og setjið saman í eina skál
- Raspið lime börkinn út á og bætið við sykrinum og limesafanum
- hrærið öllu vel saman
Jalapenjó-avocado majó
- Merjið hvítlauk út í blandara og bætið restinni af innihaldi sósunnar út í
- Blandið í blandara þar til verður að silkimjúkri kjekkjalausri sósu
Kryddhjúpur á fiskinn
- Blandið öllum kryddunum saman í litla skál
- Brjótið næst 2 egg á djúpan disk og bætið kryddunum útí og hrærið vel saman með gaffli eða písk þar til kryddið er vel blandað saman við egginn
- Setjið svo hveiti á annan disk
- Þerrið fiskinn á eldhúspappír svo mesti rakinn fari úr honum og skerið hann svo í litla ferninga á stærð við stóran tening
- Hitið alla olíuna á pönnu og veltið fiskinum upp úr hveiti og hristið allt umframhveiti af
- Veltið svo beint upp úr egginu og setjið út í heita olíuna þar til bitarnir verða fallega gylltir
- Setjið svo bitana á disk með elhúspappír á til að umframolía fari af
- Svo er bara að setja salat á taco köku, fiskinn ofan á og sósurnar yfir og njóta
![](https://paz.is/wp-content/uploads/2022/10/IMG_5498-683x1024.jpg)
Verði ykkur að góðu
María