-Samstarf-
![](https://paz.is/wp-content/uploads/2021/05/IMG_1140-683x1024.jpg)
Nú er grilltíminn að hefjast með hækkandi sól. Ég elska grillmat, en stundum getur það orðið of mikið af kjöti og brösuðum mat.
![](https://paz.is/wp-content/uploads/2021/05/IMG_1158-683x1024.jpg)
Hver segir samt að maður þurfi alltaf að setja kjötmeti á grillið ? Hér ákvað ég að búa til ofsa góðan laxaborgara sem er í senn hollur, ferskur og afar bragðgóður.
![](https://paz.is/wp-content/uploads/2021/05/IMG_1163-683x1024.jpg)
Borgarann er mjög einfalt að gera, bara skella í smá marineringu og hræra í holla góða sósu með. Laxinn þarf einungis að marinerast í 30 mínútur áður en hann fer á grillið.
![](https://paz.is/wp-content/uploads/2021/05/IMG_1181-774x1024.jpg)
Með borgaranum hafði ég ferskan grillaðan aspas sem er súper auðvelt að gera, bara pennsla með sítrónuolíunni góðu frá MUNA, salt, pipar og svo smá parmesan eftir á.
![](https://paz.is/wp-content/uploads/2021/05/IMG_1204-984x1024.jpg)
Leynihráefnið í marineringunni er sítrónuólífuolían góða frá MUNA en hvað er betra með laxi en sítrónukeimur.
![](https://paz.is/wp-content/uploads/2021/05/IMG_1172-798x1024.jpg)
Marineringinn er í senn sæt og sölt en þar spilar góða blómahunangið frá MUNA sinn sess með sínu djúpa og góða hunangsbragði.
![](https://paz.is/wp-content/uploads/2021/05/IMG_1162-683x1024.jpg)
Gott grillbragðið skín í gegn og hver biti er gómsætur. Hér þarf enginn að hafa samviskubit því þessi máltíð er hlaðin góðri næringu og vítamínum sem kroppurinn þarfnast.
![](https://paz.is/wp-content/uploads/2021/05/IMG_1226-683x1024.jpg)
Hér notaði ég hefðbundið hvítt hamborgarabrauð en því má skipta úr fyrir grófara brauð en til er gott úrval af alls kyns grófum bollum sem nota má í staðinn.
![](https://paz.is/wp-content/uploads/2021/05/IMG_1232-683x1024.jpg)
Aspasinn kemur svo í staðinn fyrir franskarnar en ég notaði afgangssósu til að dýfa honum í og það var algjört lostæti.
![](https://paz.is/wp-content/uploads/2021/05/IMG_1138-683x1024.jpg)
![](https://paz.is/wp-content/uploads/2021/05/IMG_1161-972x1024.jpg)
![IMG_1143](https://paz.is/wp-content/uploads/2021/05/IMG_1143-585x585.jpg)
Hráefni
Marinering
- 1/2 dl sojasósa
- 1/2 dl blómahunang frá MUNA
- 1 dl vatn
- 1/2 dl sítrónuólífuolía frá MUNA
- Börkur af einni sítrónu
- 1/2 tsk hvítlauksduft (athugið ekki hvítlaukssalt heldur Garlic Powder eða hvítlauksduft)
- 1/2 tsk laukduft (Onion Powder)
- Nokkrar chiliflögur en má sleppa
- Gróft salt til að nota við grillið
fetaosta-hvítlauksjógúrtsósu
- 250 gr lífrænt ræktuð grísk jógúrt (má líka vera ólífræn)
- 65 gr fetaostakubbur án olíu
- 3-4 marin hvítlauksrif
- Safi úr 1/2 sítrónu
- 1 tsk gróft salt
- svartur pipar
- 1/2 tsk cumin (athugið ekki kúmen eins og í kringlum)
- 1 msk Blómahunang frá MUNA
- Ferskt Dill eftir smekk (Ekki nota þurrkað Dill, það verður ekki eins)
Annað hráefni
- 1 stk laxaflak stórt
- 2 Avókadó
- Lambhagasalat í potti
- Ferskt Timian í potti eða klettasalat eða spínatkál ykkar er valið
- Rauðlaukur
- 4 hamborgarabrauð eða grófar brauðbollur að eigin vali
- Eitt búnt af ferskum aspas
- Sítrónuólífuolía
- salt
- pipar
- parmesan ostur
Aðferð
Marinering
- Hrærið öllum hráefnum nema sítrónuberki saman í eldfast mót
- Raspið svo börkin af sítrónunni saman við, en passið vel að taka bara gula partinn, alls ekki fara ofan í hvíta lagið því það er rammt á bragðið
- Skerið svo Laxaflakið í 4 vænar sneiðar
- Leggjið hverja sneið með bleika partinn á grúfu ofan í marineringuna og dreifið henni yfir allar sneiðarnar
- Látið standa í marineringunni upp á borði í minnst 30 mínútur (lengur ef vill en þá í kæli)
fetaosta-hvítlauksjógúrtsósu
- Hrærið jógúrtina upp í skál og blandið saman við hana hunangi, kryddum, salti og pipar
- Merjið hvítlauksrifinn út í og hrærið vel saman
- Stappið næst fetaostakubbinn vel með gaffli og hellið saman við hann sítrónusafanum meðan þið stappið
- Bætið svo út í grísku jógúrtina ásamt smátt skornu dillinu og hrærið vel saman
- Geymið í kæli meðan þið grillið laxinn og útbúið restina af matnum
Matreiðsla og samsetning
- Undirbúið nú aspasinn, takið af honum endann en það er gert með því að beigja hann og þá brotnar endinn sjálfkrafa af sem á ekki að elda með
- Setjið hann á fat og hellið sítrónuólífuolíu yfir hann og saltið og piprið
- Kveikið upp í grillinu og þegar það er heitt lækkið þá aðeins í því og setjið þá Laxinn á það með roðið niður og saltið með grófu salti bara létt yfir
- Pennslið á hann reglulega með marineringunni sem er eftir í fatinu
- Þegar laxinn er orðin fallega bleikur inn að miðju snúið honum þá niður á hvolf en gott er að setja hann þá á efri hillu en ekki beint yfir hitann. Takið af þegar hann er búin að taka á sig fallegan bleikan lit og passið að ofelda hann ekki
- Gott er að setja aspasinn á þegar um 5 mínútur eru eftir af laxinum en hann þarf c.a 5 mínútur á grillinu
- Hitið hamborgarabrauð á grillinu ef þið viljið
- Setjið fetasósu á neðra brauðið, næst kál og rauðlauk, laxinn þar ofan á og avókadó. Setjið svo aftur sósu yfir allt og annað hvort ferskt timian (alls ekki þurrkað), eða klettasalat eða Spínatkál og lokið svo með efra lokinu.
- Raspið parmesan yfir nýgrillaðan aspasinn og berið fram saman með restinni af sósunni
![](https://paz.is/wp-content/uploads/2021/05/IMG_1153-887x1024.jpg)
Verði ykkur að góðu
María