-Samstarf-
Það eru þrjár uppskriftir á blogginu mínu sem saman hafa slegið í gegn í ýmsum veislum eða viðburðum.
![](https://paz.is/wp-content/uploads/2022/05/IMG_4154-683x1024.jpg)
Þessar þrjár uppskriftir eru í miklu uppáhaldi hjá mér sjálfri og geri ég þær ansi oft ef ég á von á gestum, í veislur eða við ýmis önnur tilefni.
![](https://paz.is/wp-content/uploads/2022/05/IMG_4172-683x1024.jpg)
Þetta eru uppskriftirnar kaldhefað brauð, hvítlauksrjómaostur og grillaðar paprikur á spænskan máta. Ef þú vilt skoða þær þarftu bara að ýta á nafnið hér að ofan.
![](https://paz.is/wp-content/uploads/2022/05/IMG_4143-683x1024.jpg)
Þessir snúðar mætti segja að sameini þessar þrjár uppskriftir í eina. Kannski ekki alveg eins en svo sannarlega líkt og alls ekki síðra.
![](https://paz.is/wp-content/uploads/2022/05/IMG_4189-683x1024.jpg)
Það er þó minni fyrirhöfn að gera snúðana því þar þarf ekkert annað að gera en að hnoða í þetta dásamlega deig og gera hvílauksrjómaostinn upp úr tilbúnum rjómaosti.
![](https://paz.is/wp-content/uploads/2022/05/IMG_4157-683x1024.jpg)
Í fyllinguna notaði ég pesto frá Filippo Berio sem er svipað og grillaðar spænskar paprikur en það er einmitt gert úr kolagrilluðum paprikum.
![](https://paz.is/wp-content/uploads/2022/05/IMG_4207-683x1024.jpg)
Og til að einfalda lífið enn meira setti ég bara hvítlauksrif út í Philadelphia ost ásamt salti og steinselju og útkoma varð mjög svipuð þessum heimatilbúna.
![](https://paz.is/wp-content/uploads/2022/05/IMG_4166-683x1024.jpg)
Ef þig langar í einhverja nýbreytni og skemmtilega öðruvísi gott þá eru þessir snúðar alveg málið. Best er að bera þá fram nýbakaða og heita.
![](https://paz.is/wp-content/uploads/2022/05/IMG_4183-683x1024.jpg)
![IMG_4197](https://paz.is/wp-content/uploads/2022/05/IMG_4197-585x585.jpg)
Hráefni
Snúðadeig
- 240 gr eða 2,5 dl ilvolg nýmjólk
- 60 gr bráðið smjör
- 2 msk hunang
- 2 egg
- 11 gr þurrger eða eitt umslag
- 560 gr hveiti
- 1 tsk fínt borðsalt
Fylling
- 1,5-2 krukkur Fillipo Berio Chargrilled pepper pesto
- Rifinn mozzarella (má sleppa)
Hvítlauksrjómaostur
- 1 askja eða 200 gr Philadelphia Original rjómaostur
- 2-3 hvítlauksrif (2 ef þið viljið ekki mikið hvítlauksbragð, 3 ef þið viljið að hann rífi smá í)
- Tæplega 1/2 tsk fínt borðsalt (ekki nota gróft)
- Þurrkuð steinselja
Aðferð
Snúðadeig
- Blandið saman volgri mjólk, geri og hunangi og látið standa í eins og 5 mín þar til myndast þykk froða ofan á
- Setjið næst hveiti og salt saman í hrærivélarskál og blandið létt saman með króknum
- Brjótið egg í skál og bræðið smjörið
- Kveikjið svo á hrærivélinni við lágan hraða með krókinn á og bætið gerblöndunni við hveitið hægt og rólega, svo næst eggjunum og að lukum smjörinu
- Það verður eins og mjög feitt til að byrja með en haldið áfram að hnoða og aukið svo aðeins hraðann eftir því sem smjörið fer meira inn í deigið
- Hnoðið í eins og 3-5 mínútur eða þar til deigið er orðið silkislétt og hefur rúllað sig kringum krókinn
- Leggjið stykki yfir skálina og látið hefast á volgum stað í 30 mínútur
- Gerið rjómaostinn til á meðan með því að hræra mörðum hvítlauksrifum út í hann ásamt salti og steinselju og hræra vel saman
Samsetning
- Þegar deigið hefur hefast fletjið það þá út í ferning sem er eins og 1 cm að þykkt
- Smyrjið pesto á ferninginn og rúllið svo deigunu upp eins og þegar maður gerir kanilsnúða (ef þið viljið mikla fyllingu notið þá eins og 2 krukkur en 1,5 ef þið viljið hafa bara temmilegt)
- Ef þið notið rifinn mozzarella dreifið honum þá yfir pestoið í þunni lagi
- Skerið svo í 12 stk snúða og raðið í smurt eldfast mót með smá bili á milli snúðana eða eins og 1 cm á milli
- Setjið stykki yfir mótið og leyfið snúðunum að hefast aftur í 15 mínútur
- Bakið svo við 180 °C hita á blæstri í 20-25 mínútur
- Takið svo snúðana út og leyfið þeim að kólna í eins og 5-10 mínútur og setjið hvítlauksrjómaostakremið strax yfir og berið fram heita
![](https://paz.is/wp-content/uploads/2022/05/IMG_4180-683x1024.jpg)
Verði ykkur að góðu
María