Heimabakað Baguette brauð

Bakstur Brauð

Þetta Baguette brauð er algjör snilld. Það er mjög auðvelt og tekur stuttan tíma að gera. Það liggur við að það sé fljótlegra að baka það sjálfur en að fara út í bakarí til að kaupa eitt slíkt. Svo ég tali nú um hversu frábærlega það smakkast.

Brauðið slær alltaf í gegn hvort sem það er borðað með mat eða með ostum og áleggi. Og svo er líka hægt að nota það til að smyrja snittur, en það gerði ég í brúðkaupinu mínu og runnu þær út á núll einni.

Ég mæli með að þið skellið í eitt svona brauð. Þið eigið ekki eftir að trúa því hversu létt það er að gera það og hversu vel það smakkast !

Svo er líka alltaf hægt að frysta það og hita upp í ofninum svo það verður eins og nýbakað. Úr einni uppskrift fáið þið 2 brauð.

Í uppskriftina þarf

  • 4 bolla hveiti
  • 2 tsk salt
  • 2 msk hunang
  • 1 bréf þurrger eða 1 1/2 matskeið
  • 1 1/2 bolla af volgu vatni

Aðferð

  • Ger og hunang er sett saman í skál og hálfum bolla af volgu vatni hellt yfir. Látið standa í 5 mínútur þar til það er byrjað að freyða og orðið eins og þykkt lag ofan á blöndunni.
  • Því næst er hveiti og salt sett saman í skál og kveikt á hrærivélinni. Gerblöndunni er hellt smám saman út í. Ef þið eruð ekki með hrærivél þá hellið þið örlítið í einu af blöndunni út í hveitið.
  • Næst er allt að einum bolla af volgu vatni bætt við deigið smátt og smátt, meðan hnoðarinn hnoðar. Ef deigið verður of blautt bætið þá við hveiti.
  • Þegar deigið er búið að hringa sig í eina kúlu í kringum hnoðarann þá er það tilbúið.
  • Látið hefast í skál með stykki yfir í 30 mínútur.
  • Þegar það er búið að hefast er hveiti sett á borð eða bretti, og deigið hnoðað í kúlu.

  • Deiginu er því næst skipt í tvennt og smá hveiti sáldrað yfir deigið og á kefli.

  • Fletjið hvern part út í 1-1,5 cm þykkan sívalning, eða ferning, og rúllið svo deiginu upp eins og þið væruð að gera kanilsnúða. Síðast er svo endinn togaður yfir og brettur undir sitthvorn endann.

  • Skerið næst ræmur eða mynstur í brauðið og byrjið að hita ofninn á 210 C°. Leyfið því svo að hefa sig aftur í 10-20 mínútur undir stykki.
  • Þegar það er búið að hefa sig á ný er gott að sprauta á það vatni, rétt aður en það fer í ofninn, til að fá stökka skorpu.
  • Setjið að lokum klaka í bökunarskúffu og setjið í botninn á ofninum. Bakið svo brauðið á grind með smjörpappír í 15 til 20 mínútur eða þar til það er orðin gullin skorpa á því.

Berist fram með mat, ostum eða tapas snittum 🙂

Verði ykkur að góðu

Knús

María 

4 Comments Write a comment

Please add an author description.

4 Comments

  • Sigríður March 24, 2019

    Sæl María
    Takk fyrir þessa uppskrift. Þetta brauð er mjööög gott og allir í fjölskyldunni sammála um það, bæði ungir og gamlir. Ég er mikil brauðgerðarkona en hef aldrei bakað baquette áður, vissi ekki að það ætti að fletja út og rúlla upp! Þetta brauð verður oft á boðstólum hjá mér, greinilega 🙂
    Kveðja
    Sigríður

    • maria March 27, 2019

      Æ en dásamlegt að heyra við hérna á þessu heimili elskum þetta brauð líka og það skemmir ekki fyrir að það er svo auðvelt að gera það 🙂 Takk fyrir skilaboðin 🙂

  • Inga March 31, 2019

    Ég skil ekki alveg hvað þú gerir við þetta kefli? Bakaru það með? Það stendur ekkert um hvort það eigi að taka það út aftur 🙁

    • maria April 2, 2019

      Sæl Inga

      Er ekki alveg að skilja spurninguna en ef þú átt við kökukeflið þá er það bara notað til að fletja út deigið 🙂 Ég set það ekki inn í eða neitt þannig.

      Deiginu er svo rúllað upp eins og þegar maður gerir kanilsnúða og endarnir brettir undir, svo er skorið í brauðið aðeins ofan á og sett þannig inn í ofn 😉

      Vonandi svaraði þetta spurningunni

      kær kv María

Leave a Reply

Pin It on Pinterest