-Samstarf-

Lengi vel skildi ég ekkert hver munurinn á Pavlovu og hefðbundinni marenstertu væri. Fyrir mér var þetta allt saman bara marens. Að vissu leyti er það þannig, þ.e allar pavlovur eru marens, en ekki er allur marens Pavlova fattiði ?

Marens er yfirleitt þurr og er betra að setja á hann daginn áður til að hann verði sem bestur. Pavlova hins vegar er þurr með köntunum og verður síðan seig og rök inn að miðju og minnir helst á sykurpúða (Marshmallow) inn í.

Öfugt við marenstertur er best að setja á pavlovur rétt áður en þær eru bornar fram til að botninn verði ekki of blautur jafnvel að frauði.

 Þessi sérstaka pavlova sem hér um ræðir er bara nokkrum númerum of góð. Dásamlegur botn toppaður með rjóma, ferskum ávöxtum og svo það sem gerir kökuna algjörlega fullkomna, Vill súkkulaðihúðuð hindber, hlaup og súkkulaði.

Súrt, sætt, mjúkt og seigt úff þetta var nánast fullkomið.

Til að pavlovan heppnist sem best er galdurinn að hafa eggin við stofuhita og að mala sykurinn ögn í blandara með pulse takkanum til að hann fari sem best inn í eggjahvíturnar. Svo auðvitað þarf að nota sýru eða cream of tartar.

Í þessa dásamlegu Pavlovu þarf

• 4 eggjahvítur úr stórum eggjum (við stofuhita)
• 200 gr súperfíngerðan sykur (malaður á pulse)
• 1 tsk hreint vanillu extract
• 1/2 tsk cream of tartar eða 1 tsk af sítrónusafa, borðediki eða eplaedik (bara eitt af þessu). Ég notaði Cream of tartar
• 1 tsk kartöflumjöl (ekki sleppa)

Ofan á: 

• Drekaávöxtur, kíwi, bláber, brómber, banani
• 1/2 líter rjómi
• Vill súkkulaði húðuð hindber eða bláber (fást í krónunni og fullkomna kökuna)
• Vill hreint mjólkursúkkulaði
• Vill skógarberjahlaup
• 2 jarðaberjasmáskyr

Aðferð

1. Byrjið á að hita ofninn á 175 C° blástur
2. Setjið svo eggjahvítur í hrærivél og byrjið að þeyta á miklum hraða í alveg 5 mínútur (takið tímann)
3. Á meðan er gott að setja sykurinn í blandarann og stilla nokkrum sinnum á pulse til að mala hann fínna en þó ekki eins fínan og flórsykur
4. Setjið svo sykurinn út í eggjahvíturnar meðan þær eru enn að þeytast í tvennu lagi. Gott að láta 30 sek líða á milli og haldið áfram að þeyta í eins og tvær mínútur í viðbót
5. Bætið svo við vanillu extractinu og þeytið í 1 mínútu í viðbót
6. Slökkvið nú á hrærivélinni og setjið Cream of tartar og kartöflumjöl út í og hrærið með sleikju mjög varlega þar til það er komið vel inn í eggjablönduna
7. Setjið svo bökunarpappa á plötu og teiknið eins og 23 cm hring
8. Setjið svo alla blönduna inn í hringinn og mótið fallegan botn grynnri fyrir miðju. Svona eins og smá dæld í miðjunni
9. Stingið nú í ofninn og lækkið hitann strax niður í 95 C°og látið bakast í 90 mínútur
10. Þegar 90 mínútur eru liðnar slökkvið þá á ofninum og látið hana kólna þar inni eins lengi og kostur er. Best yfir heila nótt en annars í ekki minna en 2 klst
11. Því lengur því meira seig og sykurpúðaleg verður hún í miðjunni

Samsetning

1. Ekki setja á botninn fyrr en rétt áður en á að bera tertuna fram
2. Þeytið rjóma og bætið tveimur jarðaberjasmáskyrum út í (þessi pínulitlu) og þeytið vel saman
3. Setjið næst rjómann vel ofan á pavlovuna
4. Skerið niður ávextina sem þarf að skera og dreifið yfir rjómann
5. Setjið svo hlaup og súkkulaðihúðuð bláber yfir á milli berjanna og endið svo á að setja súkkulaði brot sem standa upp úr rjómanum
6. Berið strax fram og njótið í botn

Það er klikkun að prófa ekki þessa tertu og ég lofa að hana er mjög mjög auðvelt að gera

Knús

María 

Ertu að fylgja mér á instagram ?