Hugmyndin af þessari pavlovu fæddist fyrir þessi jól. Þar sem bragðarrefur er mitt allra uppáhald ákvað ég að reyna að koma honum í hátíðarbúning.
Ég ákvað að gera hann í líki spariköku sem myndi vera bæði jólaleg og minna á uppáhalds bragðarefinn minn. Og ekki er útkoman slæm.
Hockey Pulver, fersk jarðaber, þristur og snickers út í rjómann ! Getur ekki klikkað. Tertuna er einfalt að gera ef hún er látin vera í slökktum ofninum yfir nótt þá lukkast hún pottþétt.
Flestir vita hvað pavlova er en það er marens sem búið er að bæta í sýru og sterkju svo hann verður mjúkur inn að miðju, nánast eins og sykurpúði, en stökkur og þurr á endunum.
Ekki láta ykkur bregða ef hann er ekki alveg þurr eins og hefðbundin marens, því þannig á Pavlova akkurat að vera.
Hráefni
Pavlova
- 4 Stórar eggjahvítur
- 225 gr strásykur
- 2 tsk Maizena mjöl
- 1 tsk borðedik
Fylling
- 350 ml rjómi
- 40 gr flórsykur
- 7-10 fersk jarðaber
- 1/2 tsk. vínsteinslyftiduft eða cream of tartar
- 2 msk. Hockey Pulver
- 7 stk litlir þristar
- 2 stk lítil snickers
Aðferð
Pavola
- Hitið ofninn á 175 C° blástur
- Þeytið eggjahvíturnar þar til þið sjáið för eftir pískinn
- Byrjið þá að bæta við sykri smátt og smátt meðan þær þeytast
- Þegar þær eru alveg að verða stífþeyttar bætið þá Maizena mjöli og ediki út í og blandið vel saman
- Stífþeytið það vel að hægt er að hvolfa skálinni án þess að nokkuð hreyfist
- Teiknið hring á bökunarpappa um 23-25 cm í þvermál
- Fyllið inn í hringinn með eggjahvítunum og myndið svo dæld í miðjunni eða eins og brunn þar sem fyllingin kemur
- Lækkið nú ofninn niður í 100 C° stingið inn og bakið í 1 og hálfa klst
- Slökkvið svo á ofninum og leyfið botninum að kólna alveg í ofninum, best ef hægt er yfir nótt
- Athugið ef pavlovan er sprunginn í botninn bíttar það engu, takið bara það sem fellur af og setjið í sprungurnar áður en hún er fyllt
Samsetning
- Best er að setja á pavlovur rétt áður en á að neyta þeirra ólíkt marenstertum svo ekki gera það fyrr
- Setjið þá rjómann, flórsykur, vínsteinslyftiduft, Hockey Pulver og 5 stöppuð jarðaber (skorin smátt og stöppuð með gaffli) saman í hrærivélarskál
- Byrjið fyrst að þeyta á lágum hraða og bætið svo við hraðann þar til rjóminn er alveg stífþeyttur
- Skerið niður þristinn og snickcersið í smáa bita og leggið til hliðar
- Skerið niður rest af jarðaberjum mjög smátt
- Hrærið svo jarðaberjum, þrist og snickers ofurvarlega saman við rjómann með sleikju
- Setjið fyllinguna í brunninn á Pavlovunni eða dældina, eins miklu og þið komið fyrir
- Dreifið smá Hockey pulver yfir rjómann og skreytið með fersksum berjum, snickers og þristum
Punktar
Athugið ekki setja á tertuna rjómann fyrr en rétt áður en hún er borin fram ! Eða samdægurs, bara ekki daginn áður.
Verði ykkur að góðu
María
