Crunchy skinkuhorn með mjúkri fyllingu

Matur & Menning

Þegar Raggi var einhleypur, og við vorum að kynnast, var það siður hjá honum að baka skinkuhorn um helgar þegar var einhver góður fótboltaleikur í gangi. Maðurinn er forfallinn City aðdáandi og elskar boltann.

Ég man alltaf eftir því þegar ég var eitt sinn í heimsókn hjá honum hinum megin við vegginn, en hann var nágranni minn, þá var einmitt leikur í gangi og hann henti í þessi horn.

Mér fannst eitthvað voða fyndið að sjá þennan stóra karlmannlega mann hnoða deig og baka pínulítil og krúttileg skinkuhorn. En ætli það hafi ekki verið eitt af því sem ég féll fyrir í hans fari 🙂

Reglulega síðan hefur hann bakað þessi dásamlega góðu skinkuhorn handa okkur fjölskyldunni og eru allir vitlausir í þau. Það er mjög erfitt að stoppa þegar maður byrjar og er maður fljótur að missa töluna á því hversu mörg hverfa ofan í mann.

Þau eru bara svo ómótstæðilega góð svona nýkomin úr ofninum.

Það var ekki um neitt annað að ræða hjá Ragga en að fjöllan léti mynda sig í City treyjum. Alba er hér í móðurkviði. 

Þetta er frekar stór uppskrift en við setjum alltaf afgangshornin í poka samdægurs og svo beint í frysti. Gott er svo að hita þau upp í örbylgju eða í ofni á 200 C°í 10 mínútur, og eins eru þau sniðug í nesti fyrir krakkana.

Ef þið viljið gera þau hollari er hægt að setja 50 % hvítt hveiti og 50 % heilhveiti.

Í uppskriftina þarf

  • 650 millilítrar af volgu vatni
  • 2 matskeiðar sykur
  • 20 grömm af þurrgeri (eða 2 bréf)
  • 1 msk salt
  • 2 matskeiðar olía
  • 1 kíló af hveiti / einnig hægt að nota heilhveiti 50 % á móti því hvíta

Fylling

  • Venjuleg brauðskina eða reykt skinka / líka hægt að nota kjúklingaskinku
  • Skinkumyrja
  • Beikonsmurostur
  • Rifinn pakkaostur

Aðferð

  • Blandið saman volgu vatni, sykri  og geri og látið standa í 5 mínútur þar til freyðir.
  • Bætið þá olíunni við.
  • Því næst skal bæta við saltinu og hveitinu hægt og rólega.
  • Allt hrært saman og deigið hnoðað.
  • Látið svo hefast í um það bil eina klukkustund.

  • Eftir klukkustund er deigið flatt út og þríhyrningar mótaðir
  • Best er að nota pizzaskera en einnig er hægt að nota beittan hníf.

  • Því næst er fyllingin sett í miðjuna á þríhyrningnum
  • og honum svo rúllað upp í horn.
  • Hrærið saman mjólk og einu eggi og penslið á hornin.
  • Gott er að strá fræjum yfir hornin á meðan þau eru ennþá blaut.
  • Bakið við 200 C° hita (blástur) í um það bil 10 til 15 mínútur eða þar til þau eru orðin gyllinbrún.

Ég vona að þið eigið eftir að finna ykkur gott tilefni til að baka þessi skinkuhorn, hvort sem það er fótboltaleikur eða eitthvað annað.

Það er alltaf gaman að eiga sér einhverjar hefðir sem urðu bara til alveg óvart 🙂

 

 Þangað til næst

María 

 

 

No Comments Write a comment

Please add an author description.

No Comments

Leave a Reply

Pin It on Pinterest