Ostakökuís með fílakaramellusósu

Matur & Menning

Fyrir ykkur sem náðuð ekki að næla ykkur í Vikuna sem kom út fyrir viku síðan þá misstuð þið af einni svakalegri uppskrift sem ég var með í blaðinu. Ekki bara er hún fáranlega auðveld og fljótgerð heldur svo brjálæðislega góð. En þið þurfið ekki að örvænta því hér ætla ég að gefa ykkur þessa uppskrift af ostakökuís með fílakaramellusósu. UMMM namm fáið þið ekki bara vatn í munnin við að heyra nafnið á uppskriftini ?

Ég mun svo á næstu vikum gefa ykkur allar hinar uppskriftirnar sem voru í blaðinu, sem eru af spænskum mat sem ég lærði að gera hjá Titu Paz og ömmu á Spáni og eru í algjöru uppáhaldi hjá mér.

Ég veit samt ekki alveg hvort hægt er að kalla þennan ís uppskrift eða hugmynd…en alla vega fékk ég þessa uppskrift/hugmynd fyrir mörgum árum síðan frá Laufey vinkonu minni sem ég kynntist á stúdentagörðunum í Garðabæ fyrir 100 árum síðan.

Eitt kvöldið þegar ég lá hérna í Ben & Jerrys ostakökuís þá kom þessi uppskrift aftur upp í hugan, en ég var svo fyrir löngu búin að gleyma henni. Þessi ís er svo mikið mikið betri en nokkurn tíman Ben & Jerrys, sem má þó eiga það að gera allt of góðan ís, sem hefur bætt á mig heilum 4 kg…. bara í sumar, já takk fyrir !!!

Þetta er svo auðvelt að gera að þið gætuð þess vegna látið krakkana ykkar gera þetta ef þið eruð ekki að nenna sjálf, mæli samt með því að þið sjáið sjálf um sósuna.

Í ísinn þarf:

  • 2 l af vanilluís (ég nota Bónus ís )
  • 1 góða ostaköku með berjum.

Setjið helmingin af ísnum í skál og brjótið svo helmingin af ostakökunni yfir.

Hrærið létt saman, bara rétt svo blanda saman. Setjið svo restina af ísnum og ostakökunni út í og hrærið aftur létt til að rétt blanda saman. Setjið blönduna aftur í ísboxið sem ísinn var í og frystið í að minnsta kosti 1 klst.

 

Ísinn er góður einn og sér en með fílakaramellusósunni kemst hann á æðra plan sem ekki er hægt að lýsa 

Fílakaramellusósa

Í sósuna þarf:

  • 1 poka af fílakaramellum eða 2 poka af fílakúlum frá Góu
  • 1 pela af rjóma

Setjið allar karamellurnar eða kúlurnar með rjómanum í pott og bræðið saman við vægan hita. Hrærið reglulega í sósunni og berið hana fram heita með ísnum. Þetta er svo hættulega gott að þið eigið ekki eftir að standast þetta.

Já þetta var ekki flóknara en þetta og fyrir ykkur sem eruð að fara að að gera helgarinnkaupin mæli ég með að kippa með því sem þarf í einn svona ís.

Góða helgi og þangað til næst

Njótið vel

María 

 

 

No Comments Write a comment

Please add an author description.

No Comments

Leave a Reply

Pin It on Pinterest