Holl og góð föstudags speltpizza

Matur & Menning

Það er eiginlega orðin siður eða venja hér á þessu heimili eins og á svo mörgum heimilum á Íslandi að hafa pizzu á föstudögum. Krakkarnir eru farnir að taka því sem reglu að það sé alltaf pizza á föstudagaskvöldum og gefa ekkert eftir ef hafa á eitthvað annað. Það er líka bara skemmtilegt að eiga svona venjur og siði saman sem allir taka þátt í og að baka pizzu getur verið hin skemmtilegasta fjölskyldustund.

Þar sem krakkarnir mínir eru enn það litlir þá geri ég yfirleitt botninn og set sósu á hann og leyfi þeim svo að setja áleggið og ostinn ofan á. Það dugar þeim og þeim finnst þau taka mikinn þátt í pizzubakstrinum.

Grunnurinn af þessari uppskrift kemur úr Grænum Kosti Hagkaupa eftir Sollu á Grænum kosti en ég hef samt breytt henni töluvert og gert hana eins og mér finnst hún best.

Pizzabotninn er úr spelti en ef þið viljið, þá má alveg skipta speltinu út fyrir hveiti. Það er mjög einfalt og fljótlegt að gera þessa pizzu og það þarf ekki að eltast við heilsubúðir til að fá hráefnið í botnin. Allt fæst í Bónus.

Uppskriftin dugir í einn 16 tommu botn eða tvo þunnbotna 9-12 tommu botna. Mér persónulega finnst betra að hafa hana þunnbotna

 

Í pizzabotninn þarf :

  • 200 gr fínt spelt
  • 50 gr gróft spelt
  • 1 msk Vínsteinslyftiduft
  • 1/2-1 tsk salt
  • 2 tsk Oregano eða pizzukrydd frá Prima
  • 1/4 tsk svartur pipar
  • 8 snúningar í kvörn af Pasta Rossa kryddi frá Santa María
  • 125 ml heitt vatn
  • 1 msk hunang
  • 1-2 msk ólífuolía eða kókosolía eða 1 msk af hvorri.

Hér eru kryddin sem ég nota. Þessi pizzasósa finnst mér vera best af þeim sem ég hef smakkað úr búð 

Aðferð

  1. Mjög einfalt er að gera þennan botn en ég byrja alltaf á að setja öll þurrefnin og kryddin saman og hræra með sleif
  2. Næst set ég svo olíu út í og hræri aðeins í með sleif
  3. Svo sýð ég vatn og set 1 msk af hunangi útí
  4. Næst er svo að hnoða létt í höndunum en deigið á að vera mjög mjúkt og meðfærilegt
  5. Svo er að fletja út í eina 16 tommu eða 2 þunnbotna 9-12 tommu pizzur
  6. Forbakið botninn á 220 C°í 4-5 mínútur

Álegg

Mér finnst þessa dagana best að setja á mína pizzu

  • Hráskinku
  • Sveppi
  • Ananas
  • Furuhnetur
  • Svartar ólífur
  • Skinku
  • 1 kúlu af ferskum Mozzarella osti aukalega við rifna ostinn

 

Það er auðvitað misjafn smekkur manna með hvað þeir vilja á sína pizzu. Ég mæli með að þið prufið þessa samsetningu, hún er algjört Gourmet. Athugið að ég set hráskinkuna ofan á pizzuna áður en hún er bökuð en ekki kalda eftir á. Þannig verður hún stökk og sölt og gefur rosa gott bragð.

Að lokum þegar pizzan er komin á diskinn, toppa ég hana með Chili olíu, chili explosion kryddi, klettasalati og parmesan osti. Þetta er rosa gott ég lofa.

Er ekki bara kjörið að baka eina svona holla í kvöld. Ef svo verði ykkur þá að góðu

María 

No Comments Write a comment

Please add an author description.

No Comments

Leave a Reply

Pin It on Pinterest