Varúð hættulega góð og ofureinföld snickerskaka

Matur & Menning

Þar sem ég er afar óþolinmóð manneskja og finnst gaman að leika mér svoldið með uppskriftir þá eiga hrákökur, sem auðveldar er að gera og þarf ekki að baka í ofni mjög vel við mig. Með venjulegan bakstur er svo mikilvægt að fylgja alveg uppskrift til að klúðra ekki en þegar kemur að svona hrákökum er allt í lagi að leika sér svoldið og setja sitt blóð í þær 🙂

Þessa uppskrift fann ég í bókinni Himneskt að njóta eftir Sólveigu Eiríksdóttur, eða Sollu á Grænum Kosti eins og hún er oft kölluð. Ég reyndar, eins og með svo margar aðrar uppskriftir, fer ekki alveg 100 % eftir henni og hef breytt henni ögn. Ég er svo rosalega mikill sælkeri að mér fannst ekki vera nóg af saltri karamellu í upprunalegu uppskriftini að ég bætti um betur og jók magn karamellunar í kökunni. Ég breytti líka aðeins súkkulaðinu ofan á, auk nokkura annara smáatriða. Þó uppskriftin sé ekki alveg Sollu þá kann ég nú samt ekki við annað en að credita hana fyrir hana 😉

Bókin hennar Sollu en í henni eru margar girnilegar köku uppskriftir 

Kakan er svakalega næringarrík og holl, en maður verður alveg pakk pakk saddur af einni sneið í marga klukkutíma. Þess vegna er hún mun betri kostur en annað gúmmelaði. Hún er líka það bragðmikil að það er ekki hægt að liggja á beit í henni og hakka hana í sig, enda mettandi og tekur burt alla frekari löngun í sætindi.

Það sem er líka svo geggjað við hana er að það er bilað góð sölt karamella á milli sem þarf ekki að sjóða í potti og tekur bókstaflega innan við mínútu að gera!!!!

Hvað meira er hægt að biðja um ??

Í þessa guðdómlegu og hættulega góðu köku þarf:

Botn:

  • 150 gr Döðlur (Ég nota alltaf Medjool sem ég kaupi í Costco eða Heima mjúkar döðlur)
  • 125 gr hnetur og möndlur sem þið kjósið, ég nota oftast valhnetur og möndlur blandað saman
  • 1/4 tsk Maldon eða annað gróft salt

Setjið Möndlur og hnetur í matvinnsluvél og malið frekar fínt en alls ekki of mikið þá breytist það í smjör.

Setjið svo döðlur og salt út í og blandið saman þar til það er orðið klístrað, mér finnst gott að setja ögn af vatni út í til að láta það límast betur. 1 msk er alveg nóg.

Þjappið botninum í eldfast mót eða kringlótt glerílát og setjið í frysti í eins og 30 mín.

Millilag:

  • 1/2 krukka af grófu hnetusmjöri, ég nota alltaf lífrænt ræktað

Þegar botninn er orðin smá frosinn er hann tekinn út og hnetusmjörinu smurt yfir hann allann í þeirri þykkt og magni sem þið viljið. Ég set alltaf frekar mikið á botninn, en mér er svo sem ekki viðbjargandi þegar kemur að því að hafa eitthvað djúsí og gott;)

Sölt Karamella:

  • 1 1/3 dl hlynsíróp eða agavesíróp
  • 2/3 dl kókósolía
  • 4 msk möndlusmjör (fæst í Costco, Bónus, Hagkaup)
  • 1 tsk Maldon salt eða annað gróft salt

þessi karamella er klikkað góð þið eigið ekki eftir að trúa því. Ég hef stundum meira að segja búið hana til, til að setja út á ís eða heita eplaköku eða stundum fyrir Gabríelu dóttur mína, sem getur hreinlega drukkið hana. Eins og ég sagði er aðferðin við að gera hana svo fáránlega auðveld að það er eiginlega hlægilegt.

Það þarf að bræða olíuna í krukkunni með loki á undir heitri vatnsbunu. Svo er öllu saman hellt í blandara og þeytt þar til það er orðið að þykkri dásamlegri saltri karamellu.

Hellið karamellunni svo yfir hnetusmjörslagið og látið í frysti meðan þið gerið súkkulaðið ofan á kökuna.

Ekta súkkulaði ofan á:

  • 1 1/2 dl Kókósolía brædd undir krana í krukkuni.
  • 11/2 dl kakó
  • 3/4 dl agavesíróp
  • 1/4 tsk salt

Þegar olían er orðin alveg brædd setjið hana þá í skál og setjið kakó og agavesíróp út í.

Hrærið saman með gaffli en passið að hræra ekki of mikið þá hættir súkkulaðinu til að verða kekkjótt. Gott er að hræra með stórum hringjum og hægt þar til súkkulaðið er orðið glansandi silkimjúkt.

Takið nú kökuna úr frysti og hellið súkkulaðinu jafnt yfir hana alla. Stráið svo 1/4 tsk af salti yfir og skreytið með þeim hnetum sem þið viljið.

Mér finnst alltaf voða gott að skreyta með pistasíuhnetum.

Látið kökuna svo í frysti í 30-60 mínútur og berið fram með ískaldri mjólk með klaka í, lofa að það er geggjað !! Hún er líka mjög góð með kaffinu.

Best er svo að geyma hana alltaf í frysti en mér finnst hún best beint úr frystinum.

Ef þið viljið hafa hana aðeins mýkri leyfið henni þá að standa á borði í smástund en það tekur hana mjög lítinn tíma að þiðna ögn upp.

Eins og ég segi þá er þessi kaka hættulega góð og eiginlega hættulega auðveld að gera því maður nennir allt of oft að henda í hana, þegar manni vantar eitthvað gott, sem er aðeins of oft. En það gæti margt verið verra og óhollara en þessi kaka 😉

Vonandi eigið þið eftir að prufa hana og njóta í botn…..einu sinni smakkað þú getur ekki hætt !!!

Verði ykkur að góðu

María 

 

No Comments Write a comment

Please add an author description.

No Comments

Leave a Reply

Pin It on Pinterest