Rúgbrauð sem allir geta bakað

Bakstur Brauð

Þetta dásamlega rúgbrauð er ekki bara afskaplega bragðgott heldur er það einnig afar einfalt að baka. Hér þarf aðeins skál, desílítramál og sleif til verksins.

Brauðinu er hrært varlega saman og tekur enga stund að gera svo allir eru hæfir til verksins sem vilja, jafnvel börnin.

Brauðið er dásamlegt heitt úr ofninum með miklu smjöri og fer það afar vel með hverskonar fiskréttum, plokkfisk eða jafnvel steiktum fisk. Nú eða bara eitt og sér.

Ef þið eruð að elda fisk þá er þessi uppskrift ekki að fara að tefja ykkur neitt þó þið ákveðið að henda í eitt svona brauð því það tekur ekki nema eins og fimm mínútur að henda í það og 30 mínútur að baka það.

Leynihráefnið hér er Melassi sem gerir brauðið sætt, rakt og dökkt á litinn eins og alvöru rúgbrauð á að vera. Melassi er dökkt, þykkt en ekki mjög sætt síróp sem verður til þegar sykur er unninn úr sykurreyr.

Melassan hef ég keypt í Fræinu í Fjarðarkaupum en býst við að hann fáist einnig í Hagkaup og heilsubúðunum.

Í eitt lítið brauð þarf:

(Með þessari uppskrift verður brauðið svona litlar sneiðar en ef þið villjið hafa það stórar sneiðar þá þarf að tvöfalda uppskriftina)

  • 2 dl rúgmjöl
  • 2 1/2 dl spelt (gróft eða fínt, þið ráðið eða blandað saman)
  • 1 msk vínsteinslyftiduft
  • 1/2 tsk salt (fínt borðsalt)
  • 1 dl Melassi
  • 1 dl AB mjólk
  • 1 1/2 dl soðið heitt vatn

Aðferð:

  1. Blandið saman öllum þurrefnum í skál og hrærið með sleif
  2. Setjið næst Ab mjólk (ekki hræra strax)
  3. Setjið svo Melassa og sjóðandi heita vatnið saman og hrærið vel í glasi eða lítillri skál svo melassin leysist vel upp
  4. Hellið svo út í þurrefnin og AB mjólkina og hrærið öllu vel saman með sleif. Passið að hæra bara þar til allt er vel blandað saman og reynið að hræra sem allra minnst svo brauðið verði ekki seigt.
  5. Setjið í smurt brauðform
  6. Bakið á 180-190 C°blæstri í 35-40 mínútur
  7. Þegar brauðið á að vera til er gott að stinga ofan í það hníf og ef hann kemur hreinn upp úr er brauðið til.

Fyrir utan að vera gott þá er brauðið hollt líka

Verði ykkur að góðu

María 

 

4 Comments Write a comment

Please add an author description.

4 Comments

  • Heiðrún November 12, 2018

    Hæ þar sem ég bý á spáni og þú spænsk gætir þú sagt mér hvað ég geti sett í staðinn fyrir t,d A B mjólkina og hvað er Melassi + vínsteinslyftiduftið hér á spáni 🙂 Langar svo að prufa að baka rúgbrauðið þitt Gracias 🙂

    • maria November 12, 2018

      Sæl Heiðrún

      Í staðinn fyrir AB mjólk myndi ég bara nota Yogur natural og í stað vísnteinslyftidufts má vel nota bara þetta hefðbundna Royal lyftiduft í sama magni.
      Melassi held ég að heiti Melaza á spænsku og það fæst þá líklegast í þessum heilsubúðum en ég held þú getir alveg notað bara brennda sykurinn/sírópið sem sem er seldur í flöskum í Mercadona eins og er notað í botninn á flan 🙂

      Vona að þetta hjálpi þér eitthvað svo þú getir bakað rúgbrauðið 😉

  • Ragnhildur November 12, 2018

    Sæl María!

    Hvar fæ ég melassa?

    Bestu kveðjur.
    Ragnhildur.

    • maria November 12, 2018

      Sæl Ragnhildur

      Ég hef alltaf keypt það í fræinu í Fjarðarkaup en ég er nokkuð viss um að það fáist í heilsudeildinni í Hagkaup og einnig í Heilsubúðunum 🙂

      kv María

Leave a Reply

Pin It on Pinterest