Mexikóskar limekjötbollur með ananassalsa og guacamole

Matur & Menning

Eins og ég hef svo oft komið inn á þá er ég frekar óþolinmóð í eldhúsinu, sem og víðar, og eiga flóknar uppskriftir með miklu umstangi ekki vel við mig. Ég vil bara að hlutirnir gerist hratt, að undirbúningur og allt vesen sé í lágmarki, og að útkoman sé glimrandi góð. Ég held að það sé alveg óhætt að lofa því að þessar frábæru kjötbollur uppfylli allar þessar væntingar mínar.

Þær eru ofureinfaldar að útbúa og bragðast svo frábærlega vel, en þær eru í senn bragðmiklar og ferskar.  Limebörkurinn sem raspaður er út í hakkið gerir einhverja töfra, (honum má alls ekki sleppa), sem svo blandast dásamlega með fersku ananassalsanu og Guacamolinu. Þær þarf ekki að steikja á pönnu, haldast frábærlega vel saman og eru skemmtilegar að gera með krökkunum. Fyrir utan að allir elska þær, jafnt börn sem fullorðnir. Hvað er hægt að biðja um meira ??

Það er algjört möst að gera allt sem tilheyrir uppskriftinni. Bollurnar einar og sér eru ekki nærri jafn góðar eins og þegar helt er yfir þær safanum af salsanu og svo borið fram með guacamole og salsa. Því má alls ekki sleppa !!

En nú skulum við demba okkur í uppskriftina góðu sem hentar allt að 6 manns !!!

Í bollurnar þarf:

  • 500 gr grísahakk og 500 gr nautahakk (trúið mér þær eru bestar þannig, en einnig má nota bara grísa eða bara nautahakk)
  • 1 dl haframjöl
  • 1 msk laukduft
  • 1 msk hvítlauksduft (ath ekki með salti)
  • 2 msk tómatssósa
  • 2 msk sojasósa
  • 1 egg
  • Börkur af tveimur lime ávöxtum

Aðferð:

  1. Hitið ofninn á 190 C°
  2. Byrjið á að setja báðar tegundirnar af hakkinu saman í skál og blandið varlega saman með höndunum. Passa að hnoða ekki mikið.
  3. Setjið næst haframjöl, hvítlauks og laukduft út á.
  4. Setjið næst sósurnar og eggið og raspið limebörkinn út á. (Passið að nota bara þetta græna, alls ekki raspa niður í hvíta lagið)
  5. Hnoðið því næst öllu varlega saman þar til allt er jafnt blandað en reynið að komast af með að hnoða sem minnst svo bollurnar verði ekki seigar.
  6. Mótið næst meðalstórar bollur eða svona svipaða stærð og sænskar kjötbollur og raðið á bökunarplötu klædda smjörpappír.
  7. Bakist svo á 190 C°hita í 25 mínútur.
  8. Byrjið svo næst á að gera salsað og guacamolið á meðan bollurnar malla í ofninum.

Ananassalsa með tómötum og graslauk

Þetta salsa er bara klikkað gott með þessum bollum. Það er svo ferskt og mikill safi í því sem gott er að veiða í skeið og hella yfir bollurnar meðan snætt er.  Við það verða þær enn ferskari, safaríkari og betri á bragðið.

Í salsað þarf:

  • c.a 25 stk góða rauða litla tómata (má vera kirsuberja, heilsu, picadillo eða hvað þeir allir kallast)
  • 1 dós Del monte ananas í bitum og safinn með
  • Safi úr 1/2 lime
  • 4 vorlaukar
  • 2 msk ólífuolía
  • 5-10 dropar tabasco sósa
  • salt og pipar
  • Klípa af sykri eða annari sætu

Aðferð :

Skerið allt frekar smátt í salsað. Tómatana sker ég í tvennt en restina reyni ég að hafa frekar smátt. Hellið svo safa, tabasco og olíu út á og saltið og piprið eftir smekk. Setjið svo sætuna að lokum og smakkið til. Flóknara en það er það ekki 🙂

Einfalt og ferskt Guacamole

Þetta Guacamole er í raun bara eitthvað sem ég hef oft gert með mat og samanstendur af tveimur hráefnum. Avocado og chilibelgpipar ferskum. Þessi tvö hráefni á ég alltaf til í kæli og nota mjög mikið við matseld.

Í Guacamolið þarf:

  • 1 stórt eða 2 lítil avócado
  • 1 rauðan ferskan belgpipar
  • salt og pipar
  • limesafa ef vill

Aðferð:

Skerið belgpiparinn í tvennt og fræhreinsið ef þið viljið ekki loga í munninum. Skerið hann svo næst í örsmáa bita. Stappið avócadóið með gaffli en mér finnst það ekki þurfa að vera alveg maukað, finnst gott að hafa það gróft. Hrærið næst þessu tvennu saman og saltið og piprið eftir smekk og setjið nokkra dropa af limesafa ef vill.

Berið fram með cous cous eða grjónum

Þessar bollur bara verðið þið að prufa.  Ég hef haft þær jafnt í helgarmat sem og virka daga. Þær eru líka góðar daginn eftir og til að taka með í nesti.

Verði ykkur að góðu elskurnar

María 

 

 

2 Comments Write a comment

Please add an author description.

2 Comments

  • We Wear Glam February 10, 2018

    Loved it . Definitely trying this at home ♥️🙌🏻💯

    • maria February 11, 2018

      Do you want me to send you the recipe translated hun ?? 🙂

Leave a Reply

Pin It on Pinterest