Kaldhefað brauð… auðveldasta brauð í heimi

Matur & Menning

Árið 2013 ákváðum við Raggi að prufa að flytja út á land, því það átti að vera svo rosalega hollt og gaman. Urðu Egilsstaðir fyrir valinu þar sem Raggi fékk vinnu þar.

Ég fékk mér veiði- og skotvopnaleyfi og ætlaði sko að gerast skotveiðikona með meiru, og veiða mér í matinn 😉

Þegar á staðinn var komið og við byrjuð að búa þar fékk ég, malbikarskvísan, vægast sagt menningarsjokk. Þar var mjög lítið við að vera og var veturinn mjög erfiður. Ég fór einu sinni á rjúpu og þurfti að vaða snjó upp að nára og kom rjúpulaus heim.

Ég entist ekki í meira en 10 mánuði út á landi en ætlunin var að búa þar í 3 ár meðan Raggi tæki löggildingu í endurskoðandanum.

Búsetan á Egilsstöðum var samt ekki alslæm, en ég var í mömmuklúbb þar, sem var mjög skemmtilegur og einnig eignaðist ég kæra vinkonu sem var hvorki meira né minna en bæjarstjórafrúin sjálf.

Hún tók okkur opnum örmum og tók mig algjörlega að sér þann tíma sem ég bjó þarna. Þó hún sé aðeins of ung til að geta verið mamma mín, þá held ég að hún hafi gengið mér í móðurstað meðan ég bjó þarna.

Þessa frábæru uppskrift fékk ég einmitt hjá Sigrúnu bæjarstjórafrú, en Sigrún er algjör höfðingi heim að sækja og allt sem hún eldar og bakar er svo svakalega gott.

Þetta brauð er ég búin að baka örugglega miljón sinnum eftir að ég flutti í bæinn en það er svo fáranlega auðvelt að það er auðveldara en að hræra í hafragraut.

Brauðið þarf að gera um kvöld og eru aðeins 4 hráefni í því. Það vill ekki láta hnoða sig, né hafa of mikið fyrir sér svo það er alveg ferlega þægilegt í bakstri, auk þess að vera sjúklega gott.

Í brauðið þarf

 

  • 600 gr korn, hvaða korn sem er (ég nota oftast hvítt hveiti en hef líka notað spelt og einnig blandað saman spelti og hveiti)
  • 1 tsk borðsalt
  • 1 bréf þurrger
  • 5 dl volgt vatn

Þetta er grunnurinn og hann er góður einn og sér, en ef ég vil gera brauðið meira Gourmet þá er hægt að setja eitthvað gott útí, t.d. sólblómafræ eða annars konar fræ, fetaost og ólífur, sólþurrkaða tómata eða bara hvað sem ykkur dettur í hug.

Í þessari uppskrift bætti ég svörtum og grænum ólífum við og fetaosti.

Aðferð

  • Öllum þurrefnum er blandað saman í skál og hrært saman með matskeið eða sleif.
  • Ef þið ætlið að setja eitthvað útí brauðið þarf að gera það á þessu stigi og hræra vel við þurrefnin.

  • Svo er 5 dl af ilvolgu vatni bætt við og hrært í skálinni með sleif. Það þarf ekki að hnoða deigið og það er líka allt í lagi að það sé ekkert alveg 100 % blandað saman.
  • Reyna að hræra bara sem minnst en þannig að það blandist sem mest saman. Ef hrært er of mikið getur brauðið orðið seigt og þungt í sér.

  • Svo er matarfilma sett yfir skálina og deigið sett í ísskáp þar sem það er látið standa yfir nóttina.
  • Morgunin eða daginn eftir er deigið svo tekið út þegar það á að fara í ofninn.

  • Ég set alltaf hring af bökunarformi á bökunarplötu með smjörpappír og svo er að hella bara deiginu ofan í hringinn. Ekkert hnoð hér heldur bara setja það ofan í og skiptir engu máli þá það sé ólögulegt.
  • Það er ekki nauðsynlegt að hafa hringinn og má setja brauðið bara beint á plötu.
  • Að lokum pennsla ég brauðið með góðri olíu og strái grófu salti yfir. Þannig verður skorpan stökk og fín og saltið gerir kraftaverk.

Þetta er svo bakað í ofni á 180-190 C°hita (blástur) í 40-50 mín.

Stingið hníf í mitt brauðið þegar það er að verða til, ef það kemur klíningur á hnífinn hafið það þá lengur inni og endurtakið með hnífinn þar til það kemur ekkert á hann.

Brauðið er bilað gott með hvítlauksostinum en uppskirftina af honum má finna hér og grilluðu papríkunum sem þið finnið uppskrift af hér 🙂

Hvítlauskosturinn klikkar aldrei með þessu brauði 

Þetta brauð er það gott að það er vel hægt að bjóða upp á það í veislum eða boðum og einnig fer það vel með mat. Ég held að auðveldara brauð sé ekki hægt að gera svo ég segi bara go for it…..líka fyrir ykkur sem kunnið ekki að elda eða baka, þetta er uppskrift fyrir ykkur.

En þangað til næst…… verði ykkur að góðu og endilega munið að deila færslunni með þvi að ýta á f takkan hér fyrir neðan 😉

Adios

María 

4 Comments Write a comment

Please add an author description.

4 Comments

  • Hekla Guðmundsdóttir June 4, 2017

    Rosalega gaman að lesa þetta. Þú góð að fara bara út að veiða 🙂 Takk fyrir uppskriftina líka. Eitt annað, ekki áttu ráð við hvernig best sé að skipuleggja þvottahús þegar maður er með orma sem sóða út fötin sín eins og ég veit ekki hvað. Ég veit þú kannast örugglega eitthvað við það 🙂
    Bestu kveðjur
    Hekla 🙂

    • maria June 5, 2017

      Hæ Hekla og takk fyrir það.
      Mér fannst þessi spurning svo fyndin þegar ég las hana þar sem ég bölva hér þvottahúsinu mínu og þvottum nánast daglega 🙂 Ég er að drukkna í þvottum og finnst ég stundum ekki eiga líf fyrir þvottastandi, auk þess að þvottahúsið mitt er eina herbergið í húsinu sem hefur ekki verið tekið í gegn og er maðurinn minn mjög duglegur að henda öllum verkfærum og dóti sem hann hefur verið að nota þar inn. Svo svarið eins og er er eiginlega að ég get ekki mikið hjálpað í þessum efnum…..eins og er. Hins vegar er næsta mál á dagskrá að taka þvottahúsið í gegn og skipuleggja það og þá verður sko hent inn færslu um það. Endilega fylgstu með 🙂
      knús María

  • Kristin April 26, 2018

    Èg hef gert kaldhefada braudid nokkrum sinnum og alltaf jafn gott! En mà frysta tilbùid deig??? Èg gerdi nefnilega deig en þarf svo ekki à braudinu ad halda fyrr en eftir 3 sòlarhringa??? Kv. Kristin

    • maria May 3, 2018

      Hæ Kristín

      Nú er ég bara ekki viss með það, eina leiðin til að komast að því er bara að prófa að frysta og sjá 🙂

      Ef þú gerir það endilega leyfðu mér að heyra hvort það hafi tekist

      kv María

Leave a Reply

Pin It on Pinterest