Heimagerður hvítlauksrjómaostur

Matur & Menning

Hljómar flókið ég veit….en er svo fáranlega auðvelt að þú átt ekki eftir að trúa því. Það liggur við að osturinn geri sig sjálfur svo auðvelt er að gera hann . Það þarf hins vegar að búa hann til kvöldinu áður, þar sem hann þarf að fá að standa yfir nótt.

Eftir að ég prófaði að gera þennan ost einu sinni varð ekki aftur snúið. Hann er svo góður og það er hægt að nota hann í svo margskonar að það er bara ekki hægt að láta þessa uppskrift fram hjá sér fara.

Ég skora á ykkur að prófa að gera ostinn sem fer alveg rosalega vel með þessari snittubrauðsuppskrift. Einnig hef ég notað hann í ýmsa rétti og til að smyrja snittur með reyktum laxi og steinselju eða spínati.

Fyllt hann inn í döðlur vafðar með hráskinku og fleira og fleira….eiginlega bara allt sem mér dettur í hug og aldrei bregst hann !!!

Osturinn fer svakalega vel með kaldhefaða brauðinu og eins snittubrauðinu góða 

Ef þið eruð lítið fyrir hvítlauk má breyta honum og gera piparost. Þá gerir maður nákvæmlega það sama nema notar pipar í stað hvítlauks. Einnig hef ég gert Amaretto ost úr honum en þá setti ég Amaretto líkjör, appelsínubörk og valhnetur út í, í staðinn fyrir hvítlaukinn.

Mér finnst samt hvítlauksosturinn lang lang bestur og ætla því að henda inn uppskriftinni af honum.

Í ostinn þarf

  • 1/2 líter af rjóma
  • 1/2 líter af hreinu skyri (1 stór dós)
  • 1 tsk fínt borðsalt
  • 4-6 hvítlauksrif (ég nota alltaf 6 en þá er mjög mikið hvílauksbragð af honum)
  • Þurrkuð steinselja eftir smekk

Aðferð

  • Byrjað er á að setja rjómann og skyrið saman í skál og hræra með písk þar til það er orðið vel blandað saman og silkimjúkt.

  • Svo þarf að setja tusku yfir skál og festa með klemmum helst, eða festa tuskuna undir skálina. Því næst er blöndunni hellt ofan í tuskuna og sett til hliðar yfir nótt.
  • Það er best að setja matardisk eða eitthvað fat undir skálina því það getur farið að leka úr ostinum og hef ég stundum komið að eldhúsgólfinu á floti ef ég hef gleymt að setja eitthvað undir skálina. Eftir nóttina ætti osturinn að líta svona út. Hann á að vera stífur og laus við allan vökva.

  • Osturinn á að vera þéttur í sér eftir nóttina

  • Þá er að taka hann úr tuskunni og setja yfir í skál. Svo er bætt við 1 tsk af salti og 4-6 hvítlauksrif marinn yfir. Síðast er svo þurrkaðri steinselju sáldrað yfir eftir smekk. Mér finnst best að hafa 6 hvítlauksrif og nóg af steinselju 😉

  • Fjögur til sex hvílauksrif marin yfir og steinselju sáldrað yfir í lokinn. Þessu er síðan öllu hrært vel saman þar til osturinn er orðinn silkimjúkur og sléttur

  • Hrærið öllu vel saman þar til osturinn er orðinn silkimjúkur og glansandi. Berið hann fram með snittubrauðinu góða eða kaldhefaða brauðinu.

Enn betra er að hafa líka grillaðar spænskar papríkur með en uppskriftina má finna hér. Ég mana ykkur til að prófa þennan ost og gaman væri að heyra hvernig ykkur fannst hann.

Þangað til næst

takk fyrir mig

María 

 

 

 

 

 

8 Comments Write a comment

Please add an author description.

8 Comments

  • Hekla Guðmundsdóttir May 2, 2017

    Hlakka til að prófa 🙂 Takk æðislega fyrir þessa girnilegu uppskrift 🙂

    • maria May 4, 2017

      Það var lítið Hekla…verður gaman að heyra hvað þér fannst um ostinn 😉

  • Sandra May 2, 2017

    Er þetta osturinn úr afmælinu? Geggjaður!

    • maria May 4, 2017

      Já það passar þessi var í afmælinu 😉

  • Hulda May 2, 2017

    Ég hef prófað þennan hrikalega gódur. Flottar myndir af ferlinu hjá þér !

    • maria May 4, 2017

      Takk Hulda 🙂

  • Helga Fanney May 16, 2017

    Sæl læturðu rjóma og skyr blönduna standa á borði yfir nótt?

    • maria May 17, 2017

      Já ég hef bæði látið það standa á borði eða bara í ísskáp 🙂

Leave a Reply

Pin It on Pinterest