Ekta heimagerðir bakaríssnúðar eins og þeir gerast bestir

Matur & Menning

Þessa uppskrift fann ég í tímariti eldri borgara á Mörkinni og bara gat ekki staðist það að prófa hana. Ég var búin að klippa hana út, og geyma og gleyma, þar til ég var að skoða instagrammið mitt um daginn og sá eina sem er búsett í Noregi kommenta að hún saknaði svo íslenska bakaríssnúðsins. Undir þetta tóku fleiri Íslendingar búsettir erlendis.

Þá allt í einu mundi ég eftir þessari uppskrift og ákvað að sannreyna hana og prófa og jú ég held að það sé ekki hægt að komast nær því að gera copy af íslenskum bakaríssnúðum en þessa.

Elsku Íslendingar búsettir erlendis, þessi uppskrift er fyrir ykkur, og svo alla hina sem bara elska snúða 😉

Uppskriftin er mjög einföld og auðveld að gera en samt smá tímafrek, svo hafið nógan tíma þegar þið gerið hana 🙂

Í uppskriftina þarf

  • 700 gr hveiti
  • 1 og 1/2 tsk salt
  • 4 tsk þurrger
  • 80 gr sykur
  • 4 dl volgt vatn
  • 1 dl jurtaolía

  • Byrjið á að setja öll þurrefnin saman í skál og hrærið létt saman með króknum á hrærivélinni.

  • Bætið því næst við vökvanum og hnoðið hægt í hrærivélinni fyrst og aukið svo hraðan smátt og smátt. Það þarf að hnoða deigið í heilar 5 mínútur og takið því tíman. Næst er svo að láta deigið hefast á volgum stað undir röku stykki í 30 mínútur.

  • Þegar deigið er búið að hefast er hveiti sáldrað á borðið, og deigið tekið úr skálinni.

Fylling

  • 3 msk sykur
  • 3 msk púðursykur
  • 1 msk kanill

  • Hrærið því næst saman sykrinum og kanilnum í fyllinguna., og fletjið svo deigið út í ferning.

  • Stráið svo fyllingunni jafnt yfir ferningin og rúllið upp í lengju.

  • Skerið svo lengjuna í hæfilega bita og raðið á bökunarplötu með smjörpappa.
  • Hitið svo ofninn á 50 °c og spreyið hann að innan með volgu vatni.
  • Spreyið svo volgu vatni á snúðana og setjið í ofninn í 45 mín.
  • Gott er að spreyja vatni á þá 1-2 sinnum meðan þeir eru í ofninum, en í þessu ferli eru þeir ekki að bakast heldur eru þeir í volgum ofninum til að hefast.

  • Þegar 45 mínútur eru liðnar eru snúðarnir teknir út og ofninn hitaður upp í 210 gráður blæstri.
  • Þegar ofninn er til eru snúðarnir bakaðir í 10-12 mínútur. Þegar þeir eru til, eru þeir látnir kólna á grind meðan glassúr er gerður en um leið og þeir komu úr ofninum penslaði ég þá með sykurvatni svo þeir yrðu alveg eins og í bakarí.
  • Sykurvatnið gerði ég úr 3 msk af sykri og 4 msk af sjóðandi heitu vatni. Mikilvægt er að pensla þá um leið og þeir koma úr ofninum, sjóðandi heita.

Glassúr uppskrift

  • 4 dl flórsykur
  • 3 msk kakó
  • 100 gr brætt dökkt súkkulaði
  • 1/2 tsk salt
  • 1-2 msk kaffi
  • 1-2 msk mjólk
  • 1/2 tsk vanilludropar

  • Bræðið 100 grömm af dökku súkkulaði yfir vatnsbaði og setjið til hliðar.
  • Næst er flórsykur settur í skál og restin af þurrefnunum.
  • Hrærið þessu saman létt með skeið og setjið svo vökvann útí.
  • Ef glassúrin er of þykkur setjið þá bara dropa og dropa af vatni þar til hann verður hæfilega þykkur.
  • Þegar snúðarnir eru búnir að kólna er glassúrinn settur á og voila alles klar til að borða, en þeir eru alveg geggjað góðir með kaldri mjólk með klaka útí 🙂

Ég vona að þið sem búið erlendis náið að uppfylla snúðaþörfina með þessari uppskrift og fáið smá bragð af Íslandi með í æð um leið 😉

En þangað til næst…verði ykkur að góðu

Knús

María 

 

 

2 Comments Write a comment

Please add an author description.

2 Comments

  • Hulda June 10, 2017

    Líst vel á þessa uppsktift! Var hún fyrir mig:) Svíann?

    • maria June 27, 2017

      Já auðvitað svo þú getir nú borðað íslenskt bakkelsi þrátt fyrir að hafa yfirgefið landið 😉

Leave a Reply

Pin It on Pinterest