Cinnabon Amerískir kanilsnúðar með kremi

Matur & Menning

Ég þori varla að segja ykkur hversu svakalega þessi blessaða uppskrift af Cinnabon snúðum hefur oft gert mig brjálaða í skapinu hehe. Hljómar kannski ekkert heillandi þegar maður er að gefa uppskrift en ég bara á tímabili algjörlega hataði að baka þessa snúða og fékk nánast kvíðakast þegar blessuðum manninum mínum langaði svakalega mikið í þá.

Uppskriftin er klippt úr gömlu Fréttablaði, af manninum mínum, sem hoppaði næstum hæð sína yfir að hafa verið minntur á uppáhaldið sitt frá Ameríkuferðum úr æsku. My o my ekki var hann að fara að baka þá……neeeeiiiiii, hver þá ?

Jú auðvitað ég sem er ekki sú þolinmóðasta í bænum og vil bara súpereinfaldar uppskriftir. Ég meira að segja lét uppskriftina einu sinni hverfa og henti henni í ruslið. Ég fékk það síðan ekki af mér að henda uppáhalds uppskrift mannsins míns og tók hana aftur upp úr ruslinu hehe.

Hún er alls ekkert flókinn, þetta er bara smá ferli, en ég er alveg búin að sættast við uppskriftina. Kallinn minn er alsæll að fá reglulega uppáhalds snúðana sína.

Í snúðana þarf

  • 4 1/2 bolla af hveiti
  • 1 tsk salt
  • 1/2 bolla sykur
  • 1 bréf eða 11 gr af þurrgeri
  • 2 egg
  • 1/3 bolla olía
  • 1 bolla mjólk

  • Byrjið á að setja þurrefnin saman í skál og hrærið saman léttilega. Setjið næst mjólk, olíu og egg út í og hnoðið saman. Ef deigið er ekki að límast vel saman bætið þá mjólk í það.

  • Deigið er til þegar  það er búið að hringa sig utan um krókinn.

  • Breiðið næst stykki yfir deigið og látið hefast í 30-40 mínútur á volgum stað (Má líka hefast lengur). Ég læt það alltaf hefast yfir volgum miðstöðvarofni. Athugið að deigið hefast ekkert svakalega mikið og er frekar þungt í sér, svo ekki hafa áhyggjur af því.
  • Á meðan deigið er að hefast útbý ég kremið og fyllinguna inn í snúðana.

Í fyllinguna þarf

  • 1 Bolla af púðursykri
  • 2 1/2 msk af kanil
  • 1/3 bolla af mjúku smjöri

 

  • Mér finnst best að setja smjörlíkið aðeins í örbylgju, ekki til að bræða það alveg heldur bara mýkja það vel. Set það í svona 15-20 sekúndur. Það er allt í lagi þó hluti af því sé bráðnaður eitthvað.
  • Svo er púðursykri og kanil hrært saman við smjörið og lagt til hliðar. Mér finnst gott að þrýsta bakinu á matskeið niður og kremja fyllinguna þannig, frekar en að hræra. Þá nær maður frekar að blanda þessu vel saman.
  • Athugið að fyllingin er smá laus í sér og það þarf að þjappa henni á deigið (Kemur að því á eftir)

Í kremið ofan á þarf

 

  • 1 dl rjómaost
  • 1/4 bolla af mjúku smjöri
  • 1 1/2 bolla flórsykur
  • 1/2 tsk vanilludropa
  • Ég hita smjörið ögn í örbylgjunni eins og áður til að mýkja það. Svo hræri ég saman smjörinu, rjómaostinum og vanilludropunum. Síðast set ég svo sykurinn út í.

 

Næsta skref með snúðana

  • Þegar deigið er búið að hefast er það flatt út í ferning. Ekki hafa hann of þunnan, best að hafa hann í þykkari kantinum, því þá verða snúðarnir meira djúsí. Setjið svo fyllinguna vel yfir allt deigið. Eins og ég sagði að ofan er hún smá laus í sér svo þar þarf bara að þjappa henni aðeins á.

  • Rúllið síðan deiginu upp í pulsu, og skerið í frekar þykka bita, eins og c.a 5 cm.

  • Raðið snúðunum í eldfast mót og leyfið þeim að hefast undir stykki í svona 10 mínútur aftur ef vill, þarf samt ekki ef þið viljið sleppa því.
  • Bakið svo á 180 °C-190 C° bæstri í 15 mínútur. Snúðarnir eiga að vera gullinbrúnir þegar þeir koma úr ofninum.
  • Setjið svo síðast rjómaostakremið á snúðana sjóðandi heita og berið fram 🙂

Snúðarnir eru svakalega matarmiklir og djúsí. Maðurinn minn liggur oftast í þessu þar til það er búið og kvartar svo yfir að þyngjast um svona 2-3 kíló eftir cinnabon át 🙂 Honum finnst það samt algjörlega þess virði og mæli ég líka með að þið prófið snúðana því jú þeir eru svakalega góðir .

Verði ykkur að góðu

María 

 

 

 

No Comments Write a comment

Please add an author description.

No Comments

Leave a Reply

Pin It on Pinterest